堅持搏盡.踢出高峰|盧蔚豐:跆拳道教我自信樂觀,改變咗我嘅人生
2026年2月6日

堅持搏盡.踢出高峰|盧蔚豐:跆拳道教我自信樂觀,改變咗我嘅人生
香港跆拳道奧運第一人——盧蔚豐用跆拳道磨練意志,開發潛能 ,從業餘踢到站上巴黎奧運舞台。 呢個旅程唔係一帆風順,而係充滿汗水、傷患同堅持嘅故事。對 Chris 嚟講,跆拳道唔只係一項運動,而係佢人生嘅轉捩點,教佢遵守紀律、尊師重道,仲令佢變得充滿朝氣、自信、積極、樂觀、豁達同謙遜。Chris 話:「跆拳道除咗係競技比賽、強身健體之外,也為我開發潛能同磨練意志。跆拳道改變咗我嘅人生。」
一切都從細個開始。Chris 爸爸一向想佢學跆拳道,當時6歲嘅 Chris,經過一個義工介紹,就開始學跆拳道,一學就15年。呢個契機令佢愛上呢項運動,甚至決心走上職業道路。近年,香港跆拳道正逐步由業餘走向職業,中國香港跆拳道代表隊嘅教練團同運動員,出外比賽嘅心態已經唔再係攞經驗,而係希望晉級、企上頒獎台。自從2000年跆拳道正式成為奧運項目,Chris 雖然當時仲未出世,但24年後,佢能夠成為代表參加奧運,成為香港跆拳道奧運第一人,意義重大。佢喺巴黎奧運取得第7名,仲一度升上世界排名第7位。Chris 話:「我會牢記使命,繼續為香港跆拳道奮鬥、再創高峰。」佢特別多謝中國香港跆拳道協會同青訓組嘅教練團隊,喺佢哋悉心栽培之下,香港跆拳道運動員終於由業餘走向職業。跆拳道已經成為香港體育學院精英A項目,對 Chris 嚟講,走職業道路已經係順理成章嘅事。

講到過去比賽,最令 Chris 印象深刻嘅當然係2024年巴黎奧運。喺大皇宮過萬現場觀眾同全球直播之下,展示香港跆拳道,已經係畢生難忘。佢同自己講:「要打好每場比賽,每場都搏盡!」結果喺奧運打了3場賽事,1勝2負,整體表現「收貨」。無論賽前備戰、臨場發揮定賽事緊張氣氛,都令佢上咗寶貴一課。Chris 話:「藉着呢次奧運,我知道自己同世界頂級選手仲有一段距離,我要急起直追!」呢個經驗唔只係驕傲時刻,仲係推動佢前進嘅動力。
作為職業運動員,訓練中最艱難嘅挑戰就係傷患。Chris 青少年時期多次受傷患困擾,表現一般。之後因為疫情,大部份訓練暫停,但佢嘅傷患反而逐漸康復。教練團隊從來無放棄佢,一路為佢安排避免加重傷患嘅訓練,維持體能狀態。Chris 話:「做運動員,當你受傷、有一段時間無成績又無重大突破,就會想過放棄。但跆拳道陪我走過人生三分二時間,我點捨得放棄呀?我要繼續拼下去!」呢份堅持,令佢之後喺比賽攞到好成績,報答教練。呢個故事背後,係無數次掙扎同重生,證明傷患唔係終點,而係成長嘅一部分。
展望未來,Chris 嘅短期目標係明年亞錦賽同名古屋亞運,好希望衝擊獎牌返嚟。長遠目標,就係為下屆洛杉磯奧運做好準備!佢相信,只要持續努力,香港跆拳道可以再創佳績。

