top of page
跆拳道品勢首度入決賽,冀全職訓練助快速成長
2026年10月6日

今屆亞運跆拳道港隊共有2男4女出戰品勢及搏擊項目,賽事喺10月3日全部完成,雖然最後冇攞到獎牌,但呂靖楠 @jason_lui.223 殺入品勢決賽都係一項突破:佢成為港隊史上第一位打入亞運男子個人品勢決賽嘅運動員!佢喺決賽交出 8.8100分,攞到第8名。
第二屆出戰亞運嘅盧蔚豐 @chrislo.__ 指今日嘅對手陳雨凡佢兩年前集訓嘅時候對過,當時雙方實力差距極大,相比之下今日佢感覺唔同咗:「我覺得同佢嘅差距收窄咗,當然我嘅打法可以再細緻啲、防守仍需改善!」佢希望感謝物理治療師、營養師畀佢嘅建議及幫助,令佢喺備戰及出戰亞運嘅時候都好順利。
而教練楊子泳就指Chris啱啱做咗半年全職運動員,哩半年可以做嘅嘢都盡做,安排咗好多訓練及比賽畀佢備戰,「不過運動員都需要時間去成長,假以時日我相信佢哋一定會表現更好!」
另外,李子晴代表出戰女子個人品勢,未能晉級;四位出戰搏擊項目嘅運動員盧蔚豐(男子68公斤以下級)、張可欣(女子67公斤以上級)、何嘉雯(女子67公斤以下級)以及第三度出戰亞運嘅林小慧(女子49公斤以下級)都喺16強止步。值得一提嘅係今屆亞運新增虛擬跆拳道搏擊項目,林小慧成為香港首位參加哩個新 增項目嘅代表,搏擊同虛擬雙線作戰,辛苦晒!
睇到最後聽下呂靖楠有咩想分享!
Sportsoho
bottom of page

